The Biz Update
Related Articles
کراچی، ۱2 اگست ۲۰۲۶: ایمریٹس نے اپنے صارفین کے لیے سفر کو مزید آسان اور لچکدار بنانے کے لیے کئی نئی سہولیات متعارف کرا دی ہیں۔ ایئرلائن کے مطابق ان اقدامات سے مسافروں کو ٹکٹ کی تاریخ تبدیل کرنے، رقم کی واپسی اور سفری رکاوٹوں کی صورت میں زیادہ سہولت ملے گی۔
۱۰ اگست ۲۰۲۶ سے دبئی جانے والے مسافر مخصوص کرایوں پر بغیر کسی اضافی فیس کے اپنی سفر کی تاریخ لامحدود مرتبہ تبدیل کر سکیں گے۔ یہ سہولت اکانومی اور بزنس کلاس کے کئی کرایوں پر دستیاب ہوگی۔
ایمریٹس نے دبئی جانے والی پروازوں کے لیے ریفنڈ فیس میں بھی نمایاں کمی کی ہے۔ اکانومی سیور ٹکٹ پر ریفنڈ فیس ۵۰ امریکی ڈالر جبکہ اکانومی فلیکس ٹکٹ پر ۲۵ امریکی ڈالر ہوگی۔ بزنس کلاس میں اسپیشل اور سیور کرایوں کے لیے فیس ۵۰ ڈالر جبکہ فلیکس کرایے کے لیے ۲۵ ڈالر مقرر کی گئی ہے۔
ایئرلائن کے مطابق مفت تاریخ کی تبدیلی اور کم ریفنڈ فیس کی سہولت سے مسافر اپنے سفری منصوبوں میں تبدیلی کم مالی نقصان کے ساتھ کر سکیں گے۔
ایمریٹس کے پورے نیٹ ورک پر سفر کرنے والے مسافروں کو بھی ایک مرتبہ مفت تاریخ تبدیل کرنے کی سہولت دی جائے گی۔ یہ سہولت ۲ اپریل ۲۰۲۶ سے بک کیے گئے ٹکٹوں پر لاگو ہوگی، جن میں دبئی کے ذریعے منسلک سفر بھی شامل ہیں۔
مسافر اپنے سفری منصوبے کو حتمی شکل دینے کے لیے کرایہ ۲۴ گھنٹے تک بغیر کسی اضافی فیس کے محفوظ بھی رکھ سکیں گے۔
پرواز میں خلل کی صورت میں ایمریٹس متاثرہ مسافروں کو براہ راست رہائش کی سہولت فراہم کرے گی۔ اگر کسی دوسری ایئرلائن کی کنیکٹنگ پرواز متاثر ہو یا ایمریٹس کی سروس دستیاب نہ ہو تو مسافروں کو بغیر اضافی اخراجات کے ان کی منزل تک پہنچانے کے لیے دوبارہ بک کیا جائے گا۔ یہ سہولت فضائی حدود میں رکاوٹ کے باعث پرواز منسوخ ہونے کی صورت میں بھی دستیاب ہوگی۔
ایمریٹس اسکائی وارڈز کے اراکین بھی ۳۱ اگست ۲۰۲۶ تک اضافی سہولیات اور بچت سے فائدہ اٹھا سکتے ہیں۔
سلور، گولڈ اور پلاٹینم درجے تک پہنچنے کے لیے درکار ٹائر میلز میں ۲۰ فیصد کمی کی گئی ہے۔ اس کے علاوہ ایمریٹس اور فلائی دبئی کی پروازوں پر اراکین کو ۲۰ فیصد اضافی ٹائر میلز بھی ملیں گے۔
کیش پلس میلز کے ذریعے بھی اراکین کو زیادہ بچت حاصل ہوگی۔ خصوصی شرح کے تحت ۲ ہزار میلز کے بدلے ۳۰ امریکی ڈالر کی سہولت دی جائے گی، جبکہ عام شرح ۱۵ امریکی ڈالر ہے۔ میلز کو ایمریٹس یا فلائی دبئی کی پروازوں، اضافی سامان، لاؤنج اور نشست کے انتخاب کے لیے استعمال کیا جا سکتا ہے۔
ایمریٹس کے مطابق ان اقدامات کا مقصد مسافروں کو زیادہ انتخاب، سفری منصوبوں میں تبدیلی کی بہتر سہولت اور غیر متوقع صورتحال میں اضافی مدد فراہم کرنا ہے۔
