The Biz Update
Related Articles
ابوظہبی : پاکستان اور متحدہ عرب امارات نے ایک بڑی پیش رفت کرتے ہوئے سفارتی اور سرکاری پاسپورٹ رکھنے والے افراد کے لیے ویزا استثنیٰ کا معاہدہ کر لیا ہے۔ اس اہم معاہدے کا اعلان پاکستان کے نائب وزیر اعظم اور وزیر خارجہ اسحاق ڈار نے بدھ کے روز سوشل میڈیا پلیٹ فارم "ایکس” پر کیا۔
یہ معاہدہ ابوظہبی میں ہونے والے پاکستان-یو اے ای جوائنٹ منسٹریل کمیشن (JMC) کے بارہویں اجلاس کے دوران طے پایا، جس کی مشترکہ صدارت اسحاق ڈار اور یو اے ای کے وزیر خارجہ شیخ عبداللہ بن زاید النہیان نے کی۔
اسحاق ڈار کے مطابق، "تین اہم مفاہمتی یادداشتوں پر دستخط کیے گئے، جن میں شامل ہیں:
- ویزا استثنیٰ برائے سفارتی و سرکاری پاسپورٹ،
- مصنوعی ذہانت اور ڈیجیٹل معیشت میں تعاون،
- اور مشترکہ سرمایہ کاری کو فروغ دینا۔
یہ اقدامات دونوں ممالک کے درمیان مضبوط معاشی اور سفارتی تعلقات کی راہ ہموار کریں گے۔”
اجلاس میں تجارت، توانائی، آئی ٹی، انفراسٹرکچر اور سرمایہ کاری سمیت مختلف شعبوں میں تعاون بڑھانے پر تفصیلی گفتگو کی گئی۔ دونوں ممالک نے ادارہ جاتی روابط اور بین الوزارتی ہم آہنگی کو مزید بہتر بنانے پر بھی زور دیا۔
یہ بھی قابلِ ذکر ہے کہ یو اے ای پاکستانی ورکرز کا ایک پسندیدہ مقام ہے۔ 2024 کے دوران متحدہ عرب امارات میں 64,130 پاکستانی روزگار حاصل کر چکے ہیں، جو کل بیرونِ ملک جانے والوں کا تقریباً 9 فیصد بنتے ہیں۔ اس فہرست میں سعودی عرب اور عمان بھی نمایاں ہیں۔
سرکاری اعداد و شمار کے مطابق، سال 2024 میں مجموعی طور پر 727,381 پاکستانیوں نے بیرونِ ملک روزگار کے مواقع حاصل کیے. جو کہ پاکستان کی برآمدات کے ساتھ ساتھ، ترسیلات زر میں اضافے کی ایک بڑی بنیاد ہے
