The Biz Update
Related Articles
کراچی: محکمہ موسمیات پاکستان (پی ایم ڈی) نے کراچی سمیت ملک بھر میں آئندہ ہفتے شدید گرمی کی لہر کے حوالے سے انتباہ جاری کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
محکمہ موسمیات کے مطابق بالائی فضا میں 8 جون سے ایک ہائی پریشر سسٹم بننے کا امکان ہے جو 11 جون تک برقرار رہ سکتا ہے۔ اس سسٹم کے زیر اثر 7 سے 12 جون کے دوران ملک کے مختلف علاقوں میں ہیٹ ویو کی صورتحال پیدا ہونے کا خدشہ ہے۔
تین روزہ موسمی پیش گوئی کے مطابق کراچی میں ہفتہ سے پیر تک کم سے کم درجہ حرارت 28 ڈگری سینٹی گریڈ جبکہ زیادہ سے زیادہ 38 ڈگری سینٹی گریڈ رہنے کا امکان ہے۔ تاہم 8 سے 12 جون کے دوران شہر کا زیادہ سے زیادہ درجہ حرارت 40 سے 43 ڈگری سینٹی گریڈ تک پہنچ سکتا ہے جبکہ رات کے اوقات میں بھی گرمی کی شدت برقرار رہنے کی توقع ہے۔
محکمہ موسمیات نے خبردار کیا ہے کہ سندھ کے بیشتر علاقوں میں گرم، انتہائی گرم اور خشک موسم رہے گا۔ عوام خصوصاً بچوں، خواتین اور بزرگ شہریوں کو غیر ضروری طور پر دھوپ میں نکلنے سے گریز کرنے اور زیادہ سے زیادہ پانی پینے کی ہدایت کی گئی ہے۔
پی ایم ڈی نے شہریوں کو مشورہ دیا ہے کہ صبح 10 بجے سے شام 4 بجے تک براہ راست دھوپ میں جانے سے اجتناب کریں اور جسم میں پانی کی کمی سے بچنے کے لیے مناسب مقدار میں سیال مشروبات استعمال کریں۔
محکمہ موسمیات نے کسانوں کو بھی موسمی حالات کے پیش نظر زرعی سرگرمیوں کی منصوبہ بندی کرنے اور مویشیوں کی خصوصی دیکھ بھال کی ہدایت کی ہے۔ ساتھ ہی خبردار کیا گیا ہے کہ شدید گرمی کے باعث بجلی کی طلب میں نمایاں اضافہ ہو سکتا ہے، لہٰذا پانی کے محتاط استعمال کو یقینی بنایا جائے۔
واضح رہے کہ مئی کے آغاز میں بھی کراچی شدید گرمی کی لپیٹ میں رہا تھا جب درجہ حرارت 44 ڈگری سینٹی گریڈ تک پہنچ گیا تھا، جو رواں موسم گرما کا بلند ترین درجہ حرارت تھا۔ شدید گرمی کے باعث معمولات زندگی، تعلیمی سرگرمیاں اور کاروباری امور متاثر ہوئے تھے، جبکہ مختلف فلاحی تنظیموں نے شہریوں کی مدد کے لیے شہر بھر میں ریلیف کیمپ قائم کیے تھے۔
