The Biz Update
Related Articles
میاں محمد نواز شریف نے عمرے کی سعادت حاصل کرلی
قائد مسلم لیگ سعودی عرب میں پانچ دن قیام کریں گے جس کے بعد وہ دبئی جائیں گے
مکہ مکرمہ 13 اکتوبر 2023: پاکستان کے سابق وزیر اعظم اور پاکستان مسلم لیگ(ن)کے قائد میاں محمد نواز شریف نے کئی برس کی خود ساختہ جلا وطنی کاٹنے کے بعد لندن سے پاکستان واپسی کا سفر شروع کر دیا ہے اور پہلے مرحلے میں عمرے کے لئے سعودی عرب پہنچ گئے ۔
نواز شریف نے جمعرات کوسعودی عرب پہنچنے کے بعد ساتھیوں کے ہمراہ عمرے کی سعادت حاصل کی۔میاں نواز شریف سعودی عرب میں پانچ دن قیام کریں گے جس کے بعد وہ دبئی جائیں گے اور وہاں سے21اکتوبر کو خصوصی طیارے کے ذریعے وطن واپس آئیں گے۔
پاکستان میں ان کے استقبال کی تیاریاں بھی شروع کر دی گئیں ہیں۔ نواز شریف دوبئی سے لاہور آئیں گے ۔
نواز شریف علاج کی غرض سے عمران خان کے دور حکومت میں 19 نومبر 2019 کولندن گئے تھے اور اب تقریبا تین برس کے بعد وطن واپس آرہے ہیں ۔
عمرے کی ادائیگی کے بعد مسلم لیگ ن کے سربراہ 17 یا 18 اکتوبر کو دبئی جائیں گے۔ تین دن دوبئی میں قیام کے بعد وہ پارٹی پلان کے تحت پاکستان کا سفر کریں گے۔
نواز شریف خصوصی طیارے کے ذریعے پاکستان پہنچیں گے۔ ذرائع کا کہنا ہے کہ نواز شریف کو لے جانے والی پرواز کا نام ’’امید پاکستان‘‘ ہوگا جس میں تقریباً 150 مسافر سوار ہوں گے۔
سابق وزیراعظم، پارٹی اراکین اور صحافیوں کے ہمراہ 21 اکتوبر کو دبئی سے پاکستان کے لیے روانہ ہوں گے۔ خصوصی پرواز لاہور پہنچے گی جہاں شریف مینار پاکستان پر ایک اجتماع سے خطاب کریں گے۔
