The Biz Update
Related Articles
کراچی: گورنر سندھ کامران خان ٹیسوری نے بیلیورز اینڈ دی انوائرمنٹ کے موضوع پر گورنر ہاؤس میں منعقدہ کانفرنس سے خطاب کرتے ہوئے کہا کہ پاکستان موسمیاتی تبدیلی سے شدید متاثرہ ممالک کی درجہ بندی میں سرفہرست ہے، ماحولیاتی آلودگی کے حوالے سے ہمیں مختلف چیلنجز کا سامنا ہے، ماحولیاتی آلودگی پر قابو پانے کے لئے شہری آبادیوں میں زیادہ سے زیادہ درختوں کی ضرورت ہے، انہوں نے کہا کہ اس کے لئے عوامی بیداری کے ساتھ ساتھ تعلیمی نصاب میں آب و ہوا کے بارے میں آگاہی اور سمجھ کو بھی فروغ دیناہوگا۔
گورنر سندھ نے کہا کہ ہمیں بین الاقوامی تعاون اور شراکت کو مضبوط بنانا ہوگا، اور موسمیاتی تبدیلی کے چیلنجوں سے نمٹنے کے لئے عالمی تنظیموں کے ساتھ تعاون کرناہوگا، انہوں نے کہا کہ ہمارا دین اسلام، ایک مکمل ضابطہ حیات ہے، ماحولیاتی تحفظ کے بارے میں اسلامی نقطہ نظر کے حوالے سے قرآن و سنت، نبی اکرم صلی اللہ علیہ وسلم کی تعلیمات ہمیں بہت رہنمائی فراہم کرتی ہے۔
احادیث میں بے شمار مثالیں موجود ہیں جہاں آپ صلی اللہ علیہ وسلم درخت لگانے، پانی کو محفوظ رکھنے اور غیر ضروری استعمال سے بچنے کی ترغیب دیتے ہیں، ایک مشہور حدیث ہے کہ اگر کوئی مسلمان درخت لگاتا ہے یا بیج بوتا ہے اور پھر اس میں سے کوئی پرندہ یا انسان یا جانور کھاتا ہے تو وہ اس کے لیے صدقہ کے طور پرشمار ہوتا ہے، انہوں نے مزید کہا کہ بحیثیت مسلمان، ہمارا فرض ہے کہ ہم ان تعلیمات پر عمل کریں اور ماحولیاتی تحفظ میں بڑھ چڑھ کر حصہ لیں۔
