The Biz Update
Related Articles
اسلام آباد, 10 اکتوبر 2024: سعودی عرب کے وزیر سرمایہ کاری شیخ خالد بن عبدالعزیز الفالح کی قیادت میں 130 سرمایہ کاروں کے ہمراہ آئے، اعلی سطحی وفد نے پاک سعودی بزنس فورم میں شرکت کی جبکہ ڈپٹی وزیراعظم، وفاقی وزراء، بزنس کمیونٹی اور مالیاتی اداروں کے سینئر نمائندے بھی اس موقع پر موجود تھے۔
بزنس کانفرنس سے خطاب کرتے ہوئے وفاقی وزیر سرمایہ کاری بورڈ، نجکاری اور مواصلات عبدالعلیم خان نے کہا کہ سعودی عرب اور پاکستان کے باہمی تعلقات لازوال اور یادگار ہیں اور سعودی حکومت کے تاریخی تعاون کے پاکستان کی معیشت پر دورس اثرات مرتب ہوں گے۔انہوں نے دونوں ممالک کے مابین ان رابطوں میں اضافے کو خراج تحسین پیش کرتے ہوئے بزنس فورم کو بزنس ٹو بزنس سرگرمیوں میں اضافے کے لئے اہم پلیٹ فارم قرار دیا۔
وفاقی وزیر عبدالعلیم خان نے کہا کہ سرمایہ کاری کی وزارت سعودی بزنس کمیونٹی کو ہر ممکن مدد فراہم کرے گی اور ایک دوسرے کے اعتماد میں اضافہ کرتے ہوئے ہم تیزی کے ساتھ آگے بڑھیں گے۔ وفاقی وزیر عبدالعلیم خان نے کہا کہ پاکستان اور سعودی عرب کے مابین گہرے دوستانہ اور مضبوط معاشی تعلقات موجود ہیں جن میں آنے والے دنوں میں نمایاں اضافہ ہوگااور ہم معاشی ترقی کے نئے دور میں داخل ہوں گے۔
انہوں نے کہا کہ جغرافیائی اعتبار سے پاکستان سعودی عرب کے لئے جنوبی و وسطی ایشیا سے "گیٹ وے”ثابت ہو سکتا ہے، ہمارے پاس گہرے پانیوں والی بندرگاہیں ہیں اور پاکستان کے راستے ایشیا سے یورپ تک زمینی رابطہ ممکن ہے جبکہ یہ تمام عوامل خطے میں کاروباری حجم کو بڑھانے میں معاونت کر سکتے ہیں۔ وفاقی وزیر عبدالعلیم خان نے کہا کہ سی پیک سے بھی پاکستان کو معاشی برتری حاصل ہوئی ہے اور انفراسٹرکچر میں مزید بہتر لا کر تجارتی سرگرمیوں کو بڑھایا جا سکتا ہے۔
وفاقی وزیر عبدالعلیم خان نے اس کانفرنس کے انعقاد کو دونوں ممالک کی بزنس کمیونٹی کے لئے سود مند قرار دیا جس میں مفاہمت کی کئی ایک یادداشتوں پر دستخط ہوں گے اور نئے معاہدوں سے د و طرفہ ترقی ممکن ہو سکے گی۔ عبدالعلیم خان نے سعودی وزیر شیخ خالد بن عبدالعزیز الفالح کی آمد کو خوش آئند قرار دیتے ہوئے انہیں اپنے ہر ممکن تعاون کی پیشکش کی جس سے بالخصوص پاکستان میں سرمایہ کاری کے نئے مواقع پیدا ہوں گے۔
مزید برآں وفاقی وزیر عبدالعلیم خان نے بورڈ آف انویسٹمنٹ کے اعلیٰ حکام کے ہمراہ سعودی وفد سے اجلاس منعقد کیا جس میں حکومتی سطح پر دو طرفہ سرگرمیوں کو بڑھانے اور سرمایہ کاری کے نئے امکانات پر اتفاق کیا گیا۔سعودی حکام، مالیاتی اداروں اور عالمی مالیاتی تعاون کے ڈائریکٹرز نے بھی اس اجلاس میں شرکت کی۔ وفاقی وزیر عبدالعلیم خان نے سعودی حکومت اور شاہی خاندان کے لئے تہنیتی جذبات کا اظہار کیا اور پاکستان کے لئے اُن کے تعاون پر انہیں خراج تحسین پیش کیا۔
