The Biz Update
Related Articles
اسلام آباد، 1 نومبر 2024: سعودی عرب کے وزیر برائے سرمایہ کاری، شیخ خالد بن عبدالعزیز الفالح، نے وفاقی وزراء کا استقبال کرتے ہوئے کہا ہے کہ اُن کا حالیہ دورہ پاکستان بہت ہی مثبت اور تعمیری رہا ہے۔ اس دورے کے تناظر میں آئندہ کی پیشرفت کا جائزہ لیا جا رہا ہے۔
شیخ خالد نے 25 اور 26 نومبر کو سعودی عرب میں ہونے والے ایکسپو میں شرکت کی دعوت دیتے ہوئے پاکستان میں سرمایہ کاری کے لیے ہر ممکن تعاون کی یقین دہانی کروائی۔ اُنہوں نے کہا کہ سعودی عرب ماضی کی طرح پاکستانی معیشت اور تجارت کے فروغ میں اہم کردار ادا کرتا رہے گا اور متعین شعبوں میں سرمایہ کاری کے حجم میں مزید اضافہ کرے گا۔
وفاقی وزیر سرمایہ کاری بورڈ، عبدالعلیم خان، نے سعودی حکام کو یقین دلایا کہ پاکستان سرمایہ کاری کے لیے اہم شعبوں کی ترجیحی فہرست پر عملدرآمد کو یقینی بنائے گا۔ انہوں نے کہا کہ پاکستانی حکومت سعودی سرمایہ کاروں کے لیے سازگار ماحول فراہم کرنے کے ساتھ ساتھ غیر ضروری کارروائیوں سے گریز کرے گی۔
عبدالعلیم خان نے مزید کہا کہ نئی ضروریات کے مطابق سرمایہ کاری کے امور کو آگے بڑھانا اور پاک سعودی تعلقات کو مزید مضبوط کرنا ضروری ہے۔ انہوں نے سعودی وزیر سرمایہ کاری کی حالیہ آمد اور وزیراعظم پاکستان کے دورے کو دونوں ممالک کے عزم کی علامت قرار دیا۔
اجلاس میں یہ بھی طے پایا کہ سعودی اور پاکستانی وزراء کے مابین سرمایہ کاری کے امور پر فالواپ جاری رکھا جائے گا اور کام کی رفتار بڑھائی جائے گی۔ وفاقی وزراء، عبدالعلیم خان اور مصدق ملک، نے سعودی وزیر برائے سرمایہ کاری اور دیگر سعودی حکام کا شکریہ ادا کیا اور اسے دونوں ممالک کے لیے خوش آئند قرار دیا۔
اجلاس میں سینئر افسران نے دو طرفہ تعاون کی نشاندہی کی اور سرمایہ کاری کے آغاز کے لیے مختلف تکنیکی امور کی منظوری دی، جس کے بعد عملی طور پر سرمایہ کاری کے عمل کا آغاز ہوگا۔
