The Biz Update
Related Articles
کراچی 2 جون 2025: کراچی میں ماحول دوست ٹرانسپورٹ کے فروغ کی جانب اہم پیش رفت ہوئی ہے، جہاں شہر کے تین مختلف اور نمایاں مقامات پر الیکٹرک وہیکل چارجنگ اسٹیشنز کے قیام کے لیے جگہ مختص کر دی گئی ہے۔ اس اقدام کا مقصد شہریوں کو جدید سہولتوں کی فراہمی، ٹرانسپورٹ کے شعبے میں توانائی کے متبادل ذرائع کو فروغ دینا اور فضائی آلودگی میں کمی لانا ہے۔
مجوزہ مقامات میں بلدیہ عظمیٰ کراچی کا ہیڈ آفس، شاہراہِ فیصل پر واٹر بورڈ کی پارکنگ، اور کلفٹن میں واقع ڈالمین مال کی پارکنگ شامل ہیں۔ ان مقامات کو ٹریفک کی بلند رفتاری، شہریوں کی زیادہ آمدورفت اور اسٹریٹجک لوکیشن کے پیش نظر منتخب کیا گیا ہے۔
الیکٹرک وہیکل چارجنگ اسٹیشنز کی تنصیب کا مقصد نہ صرف مقامی سطح پر توانائی کی مؤثر استعمال کو فروغ دینا ہے بلکہ شہر میں الیکٹرک گاڑیوں کے استعمال کی راہ ہموار کرنا بھی ہے۔ اس سلسلے میں نجی شعبے کے تعاون سے چارجنگ انفرااسٹرکچر کو تیزی سے وسعت دی جا رہی ہے، اور رواں سال کے اختتام تک مزید مقامات پر چارجنگ اسٹیشنز کی تنصیب متوقع ہے۔
یہ اقدام اس وژن کا حصہ ہے جس کا ہدف کراچی کو ایک پائیدار، صاف اور جدید ٹرانسپورٹ نیٹ ورک فراہم کرنا ہے، جو نہ صرف ماحولیاتی آلودگی کو کم کرے بلکہ شہریوں کو جدید سہولتوں سے بھی ہمکنار کرے۔
اس حوالے سے میئرکراچی سید مرتضیٰ وہاب نے ملک گروپ آف کمپنیز کے سی ای او اور چیئرمین ملک خدا بخش کو الیکٹرک وہیکل چارجنگ اسٹیشن کے قیام کیلئے بلدیہ عظمیٰ کراچی کی جانب سے تین سائٹس کی فراہمی کی ہدایت کردی۔
ملک خدا بخش نے گزشتہ روز کراچی کے اہم مقامات پر الیکٹرک وہیکل (ای وی) چارجنگ اسٹیشنز کی تنصیب کے حوالے سے تبادلہ خیال کیلئے میئر کراچی بیرسٹر مرتضیٰ وہاب سے ان کے دفتر میں ملاقات کی۔ میئر کراچی مرتضیٰ وہاب نے اپنے صاف توانائی کے وژن کے تحت نمایاں مقامات مختص کرنے پر اصولی طور پر اتفاق کیا۔
یہ ملاقات صوبائی وزیرسید ناصر حسین شاہ کی رہنمائی میں ہوئی، جو اس سے قبل ان کے ساتھ ہونے والی بات چیت کا تسلسل تھی۔
