The Biz Update
Related Articles
کراچی، 05 اگست :سندھ سیڈ کارپوریشن کی بہتری اور مؤثر انتظام کے لیے اہم فیصلے کیے گئے ہیں۔ یہ فیصلے آج سندھ سیکریٹریٹ کراچی میں وزیر زراعت سردار محمد بخش خان مہر کی زیر صدارت منعقدہ اہم اجلاس میں کیے گئے۔
اجلاس میں صوبائی وزیر جام خان شورو، صوبائی وزیر سید ذوالفقار علی شاہ، سیکریٹری زراعت محمد زمان ناریجو، ایم ڈی سندھ سیڈ کارپوریشن مشتاق سومرو، ایڈیشنل سیکریٹری اردیس کھوسو، ڈپٹی سیکریٹری احمد علی شیخ، ڈپٹی سیکریٹری خالد ملک، ڈی جی ریسرچ مظہر کیریو سمیت دیگر افسران نے شرکت کی۔
اجلاس میں ایم ڈی سندھ سیڈ کارپوریشن نے ادارے کی کارکردگی پر تفصیلی بریفنگ دی۔ شرکاء نے ادارے کی بہتری کے لیے مختلف تجاویز اور اقدامات پر غور کیا۔ اس موقع پر فیصلہ کیا گیا کہ ادارے کی کارکردگی کو مزید بہتر بنانے کے لیے ایک مینجمنٹ بورڈ تشکیل دیا جائے گا تاکہ انتظامی امور کو جدید خطوط پر استوار کیا جا سکے۔
علاوہ ازیں اجلاس میں پیڈی پروسیسنگ پلانٹ اور گندم پروسیسنگ پلانٹ کے قیام کے لیے سندھ حکومت سے فنڈز حاصل کرنے کی تجویز بھی پیش کی گئی۔
صوبائی وزیر جام خان شورو نے تجویز دی کہ سیڈ کارپوریشن کے چیف ایگزیکٹو آفیسر کو مارکیٹ کی سطح پر تعینات کیا جائے تاکہ وہ براہ راست مارکیٹ کی ضروریات اور کاشتکاروں کے مسائل سے واقف ہو سکیں۔
وزیر زراعت سردار محمد بخش خان مہر نے اس بات کا اعلان کیا کہ سندھ سیڈ کارپوریشن میں نئے ممبران تعینات کیے جائیں گے اور زرعی ماہرین سے مشاورت کے بعد ادارے کی پالیسیوں کو مزید مؤثر بنایا جائے گا۔
اس موقع پر صوبائی وزیر سید ذوالفقار علی شاہ نے کہا کہ سندھ حکومت کی کوشش ہے کہ ہر کاشتکار کو معیاری بیج بروقت دستیاب ہوں تاکہ زرعی پیداوار میں اضافہ ممکن ہو۔
یہ فیصلے سندھ کے زرعی شعبے میں بہتری اور کسانوں کو معیاری بیجوں کی فراہمی کے حوالے سے ایک مثبت قدم تصور کیے جا رہے ہیں۔
