The Biz Update
Related Articles
کراچی: ایس آئی گلوبل سلوشنز (پرائیویٹ) لمیٹڈ نے پاکستان میں سیف سٹی منصوبوں اور میری ٹائم سیفٹی انفراسٹرکچر کو مضبوط بنانے کے لیے چین کی معروف ٹیکنالوجی کمپنی جوویژن ٹیکنالوجی کمپنی لمیٹڈ کے ساتھ مفاہمت کی یادداشت (MoU) پر دستخط کیے ہیں۔
چین کے شہر جینان میں قائم جوویژن ٹیکنالوجی ذہین ویڈیو سرویلنس ٹیکنالوجی فراہم کرنے والی عالمی کمپنی ہے۔ معاہدے کے تحت ایس آئی گلوبل سلوشنز پاکستان میں جوویژن کی خصوصی پارٹنر کے طور پر اے آئی پر مبنی نگرانی کے نظام سیف سٹی منصوبوں میں متعارف کرائے گی۔
شراکت داری کے تحت جدید سی سی ٹی وی سسٹمز، کلاؤڈ بیسڈ ویڈیو اینالیٹکس، فل کلر نائٹ ویژن اور مربوط کمانڈ اینڈ کنٹرول پلیٹ فارمز متعارف کرائے جائیں گے۔ ان ٹیکنالوجیز کا مقصد شہریوں کی حفاظت، جرائم کی روک تھام اور شہروں کے بہتر انتظام میں مدد فراہم کرنا ہے۔
اس تعاون کا دائرہ پاکستان کے میری ٹائم سیکٹر تک بھی وسیع کیا گیا ہے۔ ایس آئی گلوبل سلوشنز نے پاکستانی بندرگاہوں میں تنصیب کے لیے چین سے جدید پولی یوریتھین بوائز حاصل کیے ہیں۔ کمپنی کے مطابق پاکستان میں پہلی مرتبہ پولی یوریتھین بوائز متعارف کرائے جا رہے ہیں، جو کم دیکھ بھال، طویل مدت تک استعمال اور سخت سمندری و موسمی حالات کے مقابلے میں بہتر مزاحمت کی خصوصیات رکھتے ہیں۔
ایس آئی گلوبل سلوشنز کے سیف سٹی اور میری ٹائم ماہرین پر مشتمل وفد نے کمانڈر (ر) لیاقت علی پی این کی قیادت میں حال ہی میں چین کا دورہ کیا۔ وفد نے تکنیکی اجلاسوں اور مصنوعات کے عملی مظاہروں میں شرکت کی، جس کے نتیجے میں جوویژن کے ساتھ شراکت داری اور پاکستانی بندرگاہوں اور ہاربرز کے لیے IALA کے معیار کے مطابق میری ٹائم آلات کے حصول کی راہ ہموار ہوئی۔
ایس آئی گلوبل سلوشنز کے چیف ایگزیکٹو آفیسر ڈاکٹر نعمان احمد سعید نے کہا کہ کمپنی جوویژن اور سن ہیلم کے ساتھ شراکت داری پر خوش ہے کیونکہ دونوں ادارے محفوظ شہروں اور جدید بندرگاہوں کے مشترکہ وژن پر یقین رکھتے ہیں۔
انہوں نے کہا کہ یہ تعاون معیار، جدت اور عالمی معیارات کے لیے کمپنی کے عزم کی عکاسی کرتا ہے۔ انہوں نے مزید کہا کہ چینی شراکت داروں کے ساتھ مل کر ایس آئی گلوبل سلوشنز پاکستان کے شہری مراکز اور میری ٹائم انفراسٹرکچر کی حفاظت اور سیکیورٹی میں مؤثر کردار ادا کرنا چاہتی ہے۔
