پٹرولیم ڈویژن کا ایس این جی پی ایل کے گیس واجبات کی ادائیگی کے لیے پلان طلب

admin اگست 17, 2026 پاکستان, حکومت Leave a comment 0 Views

اسلام آباد: پٹرولیم ڈویژن نے سوئی ناردرن گیس پائپ لائنز لمیٹڈ () کے بڑھتے ہوئے واجبات کے مسئلے سے نمٹنے کے لیے پاور ڈویژن سے مقامی گیس اور آر ایل این جی کے بقایاجات کی ادائیگی کا قابلِ عمل منصوبہ طلب کر لیا ہے۔

ذرائع کے مطابق پٹرولیم ڈویژن نے پاور ڈویژن سے مطالبہ کیا ہے کہ واجبات کی ادائیگی کے لیے واضح ٹائم لائن بھی فراہم کی جائے۔ پاور ڈویژن کو واجب الادا رقم کی مفاہمت کے بعد 30 جون 2026 تک ادائیگی کا منصوبہ پیش کرنا تھا۔

ایس این جی پی ایل اوگرا سے جاری انٹیگریٹڈ لائسنس کے تحت قدرتی گیس کی ترسیل، تقسیم اور فروخت کرتی ہے۔ اوگرا کمپنی کی سالانہ ریونیو ضروریات کا تعین لائسنس کی شرائط، نیچرل گیس ٹیرف رولز 2002 اور اوگرا آرڈیننس 2002 کی متعلقہ دفعات کے تحت کرتا ہے۔

پٹرولیم ڈویژن کے مطابق آر ایل این جی کی فروخت اور اکاؤنٹنگ کو الگ رکھا جاتا ہے تاکہ اس کا اثر مقامی گیس کی قیمتوں اور صارفین پر نہ پڑے۔ تاہم، جب آر ایل این جی گھریلو صارفین کے لیے منتقل کی جاتی ہے تو اس کی وصولی دو سالہ مقامی گیس قیمتوں کے ذریعے کی جاتی ہے۔

ذرائع کے مطابق ایس این جی پی ایل کے نظام پر موجود بعض پرانے پاور پلانٹس کے گیس سپلائی معاہدوں کی مدت ختم ہونے کے بعد انہیں آر ایل این جی فراہم کی گئی اور ان پاور پلانٹس نے ایس این جی پی ایل کے ساتھ اس کی فراہمی کے معاہدے کیے۔

دریں اثنا، بالوکی، حویلی بہادر شاہ، بھکی اور پنجاب تھرمل سمیت چار سرکاری آر ایل این جی پاور پلانٹس ایس این جی پی ایل سے مقررہ قیمت پر آر ایل این جی حاصل کر رہے ہیں۔ نیپرا ان پلانٹس کے لیے ایندھن کی بنیاد پر بجلی پیدا کرنے کے ٹیرف کا تعین کرتا ہے۔

فروری 2026 کے آخر میں خلیجی بحران کے بعد قطر انرجی کی جانب سے ایل این جی کارگو کی فراہمی پر فورس میجر نافذ کیے جانے سے آر ایل این جی کی دستیابی متاثر ہوئی۔ اس صورتحال میں نیشنل کوآرڈینیشن اینڈ مینجمنٹ کونسل (NCMC) نے اپریل، مئی اور جون 2026 کے دوران دستیابی کے مطابق آر ایل این جی پر چلنے والے پاور پلانٹس کو مقامی گیس فراہم کرنے کا فیصلہ کیا۔

پاور سیکٹر کی ضروریات پوری کرنے کے لیے ایس این جی پی ایل نے خیبر پختونخوا کے سی این جی صارفین سے 48 ایم ایم سی ایف ڈی گیس منتقل کی، جہاں قابلِ اطلاق ٹیرف 3,750 روپے فی ایم ایم بی ٹی یو تھا۔

اوگرا کے مطابق مالی سال 2025-26 کے لیے ایس این جی پی ایل کی مقررہ اوسط قیمت 1,853 روپے فی ایم ایم بی ٹی یو تھی۔ تاہم، اپریل سے جون کے دوران پاور پلانٹس کو مقامی گیس 2,000 روپے فی ایم ایم بی ٹی یو کے حساب سے فراہم کرنے کی تجویز دی گئی۔

پٹرولیم ڈویژن نے نشاندہی کی کہ اگر پاور پلانٹس سے آر ایل این جی کا مقررہ ٹیرف وصول کیا جاتا تو بجلی کی قیمت میں فی یونٹ تقریباً 50 پیسے سے 1 روپے تک اضافہ ہو سکتا تھا۔ اس کے نتیجے میں صارفین کے لیے بجلی کے نرخ مزید بڑھنے کا خدشہ تھا۔

تاہم، پٹرولیم ڈویژن نے خبردار کیا کہ مقامی گیس کو آر ایل این جی سے کم قیمت پر فراہم کرنے سے ایس این جی پی ایل کو ریونیو نقصان ہوگا اور گیس سیکٹر کے گردشی قرضے میں مزید اضافہ ہو سکتا ہے۔

دسمبر 2025 تک گیس سیکٹر کا بنیادی گردشی قرضہ تقریباً 1.8 ٹریلین روپے تھا، جبکہ پاکستان اسٹیٹ آئل (PSO) کے ایس این جی پی ایل سے آر ایل این جی کی فروخت کے سلسلے میں تقریباً 301 ارب روپے کے واجبات بھی تھے۔

پٹرولیم ڈویژن نے اقتصادی رابطہ کمیٹی (ECC) کے سامنے متعدد تجاویز پیش کیں، جن میں مقامی گیس کی قیمت 2,000 روپے فی ایم ایم بی ٹی یو مقرر کرنا اور پاور سیکٹر کے واجبات کی بروقت ادائیگی کے لیے ایسکرو اکاؤنٹ کے ذریعے ہفتہ وار بلنگ اور ادائیگی کا نظام شامل تھا۔

ای سی سی نے پٹرولیم ڈویژن کی تجاویز کی منظوری دے دی ہے۔

دوسری جانب پاور ڈویژن نے مؤقف اختیار کیا کہ ادائیگی کا طریقہ کار متعلقہ گیس سپلائی معاہدوں کے مطابق طے ہونا چاہیے۔ پاور ڈویژن کے مطابق سینٹرل پاور پرچیزنگ ایجنسی گارنٹیڈ (CPPA-G) دستیاب فنڈز کے مطابق پاور پلانٹس کو واجب الادا توانائی کی ادائیگیاں کرے گی، جبکہ پاور پلانٹس اپنے معاہدوں کے تحت ایس این جی پی ایل کو ادائیگی کریں گے۔

ای سی سی کی جانب سے ایسکرو اکاؤنٹ اور ہفتہ وار ادائیگی کے نظام کی منظوری کا مقصد پاور سیکٹر کے واجبات میں مزید اضافے کو روکنا اور گیس سیکٹر کے گردشی قرضے پر دباؤ کم کرنا ہے۔

Please follow and like us: