کراچی پورٹ کی 140 ایکڑ واٹر فرنٹ اراضی پر میری ٹائم بزنس ڈسٹرکٹ بنانے کے لیے سعودی سرمایہ کاروں سے معاہدہ

کراچی پورٹ پر میری ٹائم بزنس ڈسٹرکٹ بنانے کے لیے سعودی سرمایہ کاروں سے معاہدہ

admin جون 6, 2026 پاکستان, کاروبار Leave a comment 2 Views

کراچی: کراچی پورٹ ٹرسٹ کی 140 ایکڑ واٹر فرنٹ اراضی پر میری ٹائم بزنس ڈسٹرکٹ قائم کرنے کے لیے سعودی و پاکستانی شراکت داروں کے درمیان مفاہمتی یادداشت پر دستخط ہو گئے ہیں ۔ پاکستان نے سعودی عرب اور مقامی شراکت داروں کے ساتھ کراچی پورٹ ٹرسٹ (کے پی ٹی) کی واٹر فرنٹ اراضی پر ایک جدید میری ٹائم بزنس ڈسٹرکٹ کے قیام کے امکانات کا جائزہ لینے کے لیے مفاہمتی یادداشت (ایم او یو) پر دستخط کر دیے ہیں۔

وفاقی وزیر برائے بحری امور محمد جنید انور چوہدری کے مطابق مفاہمتی یادداشت کراچی پورٹ ٹرسٹ، سعودی بزنس کونسل۔نجد گیٹ وے ہولڈنگ کمپنی، عارف حبیب ڈولمین ریئٹ مینجمنٹ لمیٹڈ (AHDRML) اور پاکستان کارپوریٹ کنسورشیم کے درمیان طے پائی۔

منصوبے کے تحت کراچی کے ایم ٹی خان روڈ پر واقع کراچی پورٹ ٹرسٹ کی 140 ایکڑ قیمتی واٹر فرنٹ اراضی کو ایک جدید تجارتی اور بحری کاروباری مرکز میں تبدیل کرنے کی تجویز دی گئی ہے۔ مجوزہ ترقیاتی منصوبے میں جدید کمرشل انفراسٹرکچر کی تعمیر شامل ہوگی، جس کا مقصد ملکی و غیر ملکی سرمایہ کاری کو فروغ دینا، روزگار کے نئے مواقع پیدا کرنا اور شہری ترقی کی رفتار تیز کرنا ہے۔

وفاقی وزیر بحری امور نے کہا کہ یہ اسٹریٹجک شراکت داری کراچی پورٹ ٹرسٹ کے واٹر فرنٹ اثاثوں کی مکمل صلاحیت کو بروئے کار لانے اور پاکستان کو بحری تجارت و سرمایہ کاری کے علاقائی مرکز کے طور پر ابھارنے کا ایک اہم موقع فراہم کرے گی۔

انہوں نے واضح کیا کہ منصوبے پر عملی پیش رفت سے قبل پاکستان کے تمام قانونی اور ریگولیٹری تقاضے پورے کیے جائیں گے۔

وزارت بحری امور کے مطابق سعودی وفد نے پاکستان کے میری ٹائم سیکٹر میں وسیع تر تعاون میں گہری دلچسپی کا اظہار کیا، جس میں بندرگاہی انفراسٹرکچر، لاجسٹکس اور متعلقہ ترقیاتی منصوبوں میں ممکنہ سرمایہ کاری بھی شامل ہے۔

محمد جنید انور چوہدری نے کہا کہ سعودی وفد کا یہ دورہ پاکستان اور سعودی عرب کے درمیان اقتصادی تعلقات کو مزید مضبوط بنانے کی وسیع تر کوششوں کا حصہ ہے، جس کے تحت بندرگاہوں، لاجسٹکس، بنیادی ڈھانچے اور تجارتی سہولت کاری کے شعبوں میں سرمایہ کاری کے مواقع تلاش کیے جا رہے ہیں۔

انہوں نے مزید کہا کہ اگر منصوبے کو متعلقہ اداروں کی منظوری حاصل ہو جاتی ہے تو یہ خطے کے سب سے بڑے واٹر فرنٹ کمرشل منصوبوں میں شمار ہو سکتا ہے، جو کراچی کی معاشی سرگرمیوں اور پاکستان کی بحری معیشت کے لیے ایک اہم سنگ میل ثابت ہوگا۔

Please follow and like us: