The Biz Update
Related Articles
اسلام آباد، 15 نومبر 2024: سپین کی سینٹ افیئرز کمیٹی کے وفد نے وفاقی وزیر برائے سرمایہ کاری بورڈ، نجکاری، اور مواصلات، عبدالعلیم خان سے ملاقات کی، جس میں باہمی دلچسپی کے امور اور دوطرفہ تعاون پر تبادلہ خیال کیا گیا۔
وفد میں سپین کے سینیٹرز ویکنٹ ایزپیٹیراٹ، نطالیہ اسیرو، انٹونونیو گتریز، اور لوئیس ڈی لا پینا شامل تھے۔ ملاقات کے دوران وفاقی وزیر نے پاکستان میں سرمایہ کاری کے مواقع پر روشنی ڈالتے ہوئے کہا کہ یہاں منافع کی شرح دنیا کے دیگر ممالک کے مقابلے میں زیادہ ہے۔ انہوں نے مزید کہا کہ وسائل کو بہتر منظم کرنے سے ملک کی معیشت میں بہتری لائی جا سکتی ہے۔
وفاقی وزیر نے کہا کہ پاکستان اور سپین کے درمیان بزنس ٹو بزنس تعلقات کو فروغ دینا چاہیے، تاکہ بڑے پیمانے پر دو طرفہ تجارتی سرگرمیاں شروع کی جا سکیں۔ انہوں نے سپین کے سفیر سے کہا کہ وہ اپنی کمپنیوں کی فہرست فراہم کریں تاکہ انہیں پاکستان میں سرمایہ کاری کے لیے مدعو کیا جا سکے۔
سپین کے سینیٹرز نے انجینئرنگ، ہائی ویز، اور دیگر انفراسٹرکچر کے شعبوں میں دوطرفہ تعاون بڑھانے کی اہمیت پر زور دیا اور پاکستانی مصنوعات جیسے چاول، کپاس، اور آم کا خوشگوار انداز میں ذکر کیا۔ وفد نے کہا کہ دونوں ممالک باہمی تجارت اور کاروباری تعلقات کو فروغ دے کر ایک دوسرے کے تجربات سے فائدہ اٹھا سکتے ہیں۔
ملاقات کے دوران، آئندہ ماہ منعقد ہونے والے "ایکسپو ایونٹ” پر بھی گفتگو ہوئی، جو دوطرفہ تعلقات کو مزید مضبوط بنانے میں معاون ثابت ہوگا۔
پاکستان میں سپین کے سفیر جوز اے ڈی اورے اور سپین میں پاکستان کے سفیر ظہور احمد نے بھی ملاقات میں شرکت کی اور دوطرفہ سرمایہ کاری اور کاروباری تعلقات کو فروغ دینے کے لیے بھرپور تعاون کی یقین دہانی کرائی۔
سپین کے وفد نے اپنے قیام کو خوشگوار قرار دیتے ہوئے کہا کہ پاکستان کے ساتھ تعلقات مزید مستحکم کرنے کے لیے مواقع کا بھرپور فائدہ اٹھایا جائے گا۔
