The Biz Update
Related Articles
کراچی: 18 نومبر 202، نیا ناظم آباد میں سندھ سوئمنگ ایسوسی ایشن کے زیر اہتمام اور نیا ناظم آباد جمخانہ کے تعاون سے منعقدہ اکسٹھویں سندھ اوپن اور بوائز ایج گروپ سوئمنگ چیمپئن شپ اپنے اختتام کو پہنچی۔ اس دو روزہ ایونٹ میں کراچی گرامر اسکول کے تیراکوں نے شاندار کارکردگی کا مظاہرہ کرتے ہوئے ایک ہزار چار سو باسٹھ پوائنٹس کے ساتھ چیمپئن شپ ٹرافی جیت لی۔
ایونٹ میں کراچی کلب نے چار سو اٹھاسی پوائنٹس کے ساتھ دوسری پوزیشن حاصل کی، جبکہ بے ویو اسکول نے چار سو اکیاسی پوائنٹس کے ساتھ تیسری پوزیشن پر قبضہ کیا۔ اس چیمپئن شپ میں سندھ بھر کے اٹھارہ اداروں کے تین سو سے زائد سوئمرز نے حصہ لیا اور اپنی صلاحیتوں کا بھرپور مظاہرہ کیا۔
مہمان خصوصی، جاویداں کارپوریشن کے چیف ایگزیکٹیو آفیسر، عبدالصمد حبیب نے کامیاب کھلاڑیوں میں انعامات تقسیم کیے اور اس موقع پر اپنے خطاب میں کہا، "یہ ایونٹ پاکستان کے نوجوانوں کے بے پناہ ٹیلنٹ کا غماز ہے۔ مستقبل میں ہم اس طرح کے مزید ایونٹس کی میزبانی کریں گے تاکہ نوجوانوں کو اپنے کھیل کے میدان میں مزید بہتر مواقع فراہم کیے جا سکیں۔”
عبدالصمد حبیب نے مزید کہا، "پاکستانی نوجوانوں میں کھیل کے حوالے سے بہت سی صلاحیتیں موجود ہیں اور ان کو سپورٹ کرنے کی ضرورت ہے تاکہ عالمی سطح پر ان کا معیار بلند ہو سکے۔”
اس موقع پر نیا ناظم آباد جمخانہ کے صدر سید محمد طلحہ، سندھ سوئمنگ ایسوسی ایشن کے صدر کرنل سعید احمد خان، سیکریٹری اظہار الحق، رکن پاکستان اولمپک ایسوسی ایشن وینا مسعود اور منیجر اسپورٹس محمد آصف سمیت شہریوں کی بڑی تعداد بھی موجود تھی۔
چیمپئن شپ کے اختتام پر کھلاڑیوں اور حاضرین نے اس شاندار ایونٹ کو کامیاب بنانے پر نیا ناظم آباد جمخانہ اور سندھ سوئمنگ ایسوسی ایشن کی ٹیم کی تعریف کی۔ یہ ایونٹ نہ صرف پاکستان کے سوئمنگ کے میدان میں اہم سنگ میل ثابت ہوا بلکہ نوجوانوں کو کھیلوں میں مزید کامیابیاں حاصل کرنے کے لیے حوصلہ بھی دیا۔
