The Biz Update
Related Articles
بیجنگ،چین۔26ستمبر:۔۔۔چین، افغانستان، تاجکستان اور پاکستان کے مابین 4ملکی ٹرانزٹ روڈ کے معاہدے پر بات چیت جاری ہے جس سے پاکستان کو تاجکستان کے لئے چین کے راستے خنجراب، کاشغر، مرغاب اور دوشنبے سے بلا واسطہ تجارتی راہداری ملے گی اور دو طرفہ تجارت بالخصوص برآمد کی جانے والی مصنوعات کو فروغ ملے گا۔ اس امر کا اظہاروفاقی وزیر مواصلات، سرمایہ کاری بورڈ اور نجکاری عبدالعلیم خان نے بیجنگ چین میں تاجکستان کے وزیر ٹرانسپورٹ عظیم ابراہیم سے ملاقات میں گفتگو کرتے ہوئے کیا۔
انہوں نے کہا کہ پاکستان جوائنٹ منسٹریل کمیٹی اور جوائنٹ ورکنگ گروپ کے اجلاس کے لئے تیار ہے۔انہوں نے تاجکستان کے حالیہ دورے کے مثبت اثرات کے طور پر دونوں ممالک کے مابین ڈائریکٹ فلائٹ کے آغاز کو خوش آئند قرار دیا۔ وفاقی وزیر عبدالعلیم خان نے کہا کہ پاکستان تمام وسط ایشیائی ممالک سے دو طرفہ تجارت کے فروغ کا خواہاں ہے جس کے لئے ٹرالرز اور تاجکستان جانے والے ڈرائیورز کے درپیش مسائل حل کریں گے۔
انہوں نے بیجنگ چین میں جاری گلوبل ٹرانسپورٹ فورم کے انعقاد کو سراہا جس سے بالخصوص ایشیائی ممالک کے مابین بہم رابطوں اور تعاون کو فروغ ملے گا۔ تاجکستان کے وزیر ٹرانسپورٹ عظیم ابراہیم نے پاکستانی عوام کے لئے خیر سگالی کے جذبات کا اظہار کرتے ہوئے مئی میں وفاقی وزیر عبدالعلیم خان کی قیادت میں جوائنٹ منسٹریل کمیٹی کے اجلاس کو سراہا اور مستقبل میں باہمی تعاون اور مشترکہ کاروباری سرگرمیوں کے فروغ پر اتفاق رائے کیا۔
تاجکستان کے وزیر برائے ٹرانسپورٹ عظیم ابراہیم اور پاکستان کے وفاقی وزیر برائے مواصلات عبدالعلیم خان نے 4ملکی ٹریفک اینڈ ٹرانزٹ ایگریمنٹ پر بھی گفتگو کی اور اس امر پر اتفاق ہوا کہ باہمی معاہدوں پر پیش رفت جاری رہے گی۔دونوں وزراء صاحبان نے اپنے اپنے وفود کے ہمراہ خوشگوار ماحول میں اجلاس منعقد کیا جس میں مختلف معاہدوں کے لئے ورکنگ گروپس تشکیل دینے اور اہم تجاویز پر تبادلہ خیال ہوا۔
